Облыс әкімдерінің орынбасарлары EXPO қалашығымен танысты
Дереккөз: www.24.kz
EXPO көрмесіне қатысушы 115 елдің 90-ы павильондарын безендіруге кірісіп кеткен. Ал қалашық аумағындағы құрылыс аяқталуға жақын.
Бұл туралы облыс әкімдерінің орынбасарларымен өткен кездесуде ұлттық компания төрағасы Ахметжан Есімов мәлімдеді. Оның айтуынша, негізгі нысандар қолданысқа беруге дайын. Құрылыстың аяқ алысы, халықаралық маңызды шараға дайындық барысын бүгін облыс әкімдерінің орынбасарлары өз көздерімен көріп, қалашықты аралады. Ахметжан Есімов әкімдік өкілдерін билетті сатып алуға үгіттеп қана қоймай, тұрғындарға EXPO-ның маңыздылығын насихаттауға шақырды.
Ахметжан Есімов, «Астана ЭКСПО-2017» ҰК» АҚ төрағасы:
– Жалпы мұндай көрме біздің өңірде ТМД мемлекеттерінің ішінде бірінші рет өткізіліп отыр. Осыны түсіндіріп айту керек. Әсіресе жастар, мектеп оқушылары, студенттер. Оларға келешекке ой туғызады. Дүниежүзінде жасалып жатқан еңбектерді көреді.
ШҚО-дағы жылыжайда тропикалық жемістер өсіріледі
Дереккөз: www.24.kz
Қысы-жазы жайқалып тұратын бақ немесе тропикалық джунгли. Шығыс Қазақстандағы Украинка ауылында орналасқан жылыжайды дәл осылай атауға болады. Таңғажайып өсімдіктер әлемін өз көзімен көруге ықыласы ауғандар қатары күн санап артып келеді.
Хоббиді бизнеске айналдыра білу де өнер. Саналы ғұмырында инженер-техник қызметін атқарған Людмила Земляная зейнет жасына жеткенде өмірінің жаңа белесіне қадам басты. Осыдан 9 жыл бұрын жылыжай ашып, тропикалық және субтропикалық дақылдарды өсіруге ден қояды. Еңбегі нәтижесіз емес. Ойындағы өсімдіктері өсіп, таңғажайып баққа айналды. Енді түрлі өсімдіктерді көру үшін тұрғындарға шетелге барудың қажеті жоқ. Украинка ауылына келсе болғаны.
Людмила Земляная, жылыжай иесі:
– Өсімдіктер өте бейімделгіш келеді. Бастысы лайық жағдай жасау. Бәрі де классикалық үлгі бойынша жарық беру, суару және қоректендіру болды. Мысалы мен лимонды жақсы көремін. Оның күтімі де оңай. Қыста жарықты аз беру керек. Күтім болса өнім де көп алуға болады. Ал төгілген гүл мен хош иіс жанға жайлылық береді.
Жылыжайда өсімдіктің 500-ге жуық түрі бар. Әрқайсысына ерекше күтім мен қамқорлық қажет. Махаббатқа бөленген жемістер өнімді мол береді. Көпшілікті тәнті еткен алып лимондар мен кішкентай банандарды тамашалаушылар еліміздің түкпір-түкпірінен келеді екен. Мектеп оқушылары да осында.
Мәриям Тұрғанбек, оқушы:
– Мына жерге мен бірінші рет келдім. Маған мына жерде өте ұнады. Соншалықты көп ағаштар мен гүлдерді мен ешқашан көрген жоқпын.
Гүлім Сұлтан, оқушы:
– Маған қатты ұнады. Мен гүлдерді жақсы көремін. Менің есімде пальма, лилия өсімдіктері қалды.Содан кейін мен қызғалдақ көрдім.
Жалпы аумағы мың шаршы метрді құрайтын кешен төрт топтан тұрады.
Мерей Мұратханқызы, Twitter@muratkhankyzy:
– Көздің жауын алатын өсімдіктер мекені. Мұнда тропикалық өсімдіктер де және экзотикалық жемістер де бар. Әсемдік пен эстетика үйлесім тапқан жылыжайда 300-ден аса ұрпағымен әйгіленген Шыңғыс хан тұтынған мурайя өсімдігі бар. Денсаулыққа пайдалы өсімдікті жапон императорлары да қорған ретінде тұтынған деседі.
Өңір натуралистері мен флористері де жылыжайдың тұрақты меймандарына айналған. Ғылыми жұмыстар бойынша келісім жасау үшін еліміздің өзге өңірлерінен де мамандар келеді екен.
Айнаш Кітапбаева, биология кафедрасының меңгерушісі:
– Тропикалық өсімдіктер бар, лимон өсіріледі, ауылшаруашылық дақылдары да өсіріліп жатыр екен. Солардың бәрін көрдік. Енді студенттерімізді жылыжайға әкеліп, жұмыс жасап, байланыста болсақ деген жоспарымыз бар.
Жанға ләззат сыйлар хош иіс, жылы леп, таза ауа, көз тартар гүлдер мен бағалы ағаштар жылдың төрт мезгілінде жайқалып тұрады. Бастысы, еселі еңбек жемісін беруде.
Авторлары: Мерей Мұратханқызы, Аслан Төлепов
Жасыл экономика. Адамның табиғатқа тигізетін зияны
Дереккөз: www.24.kz
Адам әрекетінен табиғатқа келетін кесірді тиімді технология, бірізді саясат пен энергоменеджмент арқылы азайтуға болады. Бүгінде еліміз «жасыл» экономикаға көшу тұжырымдамасын жүзеге асырып жатыр. Бұл Қазақстанның тұрақты дамуын қамтамасыз ететін инструменттердің бірі. Сондай-ақ бұл межеге жету арқылы еліміз 30 дамыған мемлекеттің қатарына кіре алады.
EXPO көрмесі аясында ШЫҰ күні өтеді
Дереккөз: www.24.kz
Шанхай ынтымақтастық ұйымының алдағы саммиті – тарихи сәт болмақ. Бұл туралы аталмыш ұйымның бас хатшысы Рашид Әлімов «Астана ЭКСПО-2017» ҰК» АҚ басқарма төрағасы Ахметжан Есімовпен кездесуінде айтты.
Тараптар маусым айында елордада ашылатын Халықаралық мамандандырылған көрменің дайындығын талқылады. Көрме шеңберінде өткізілетін Шанхай ынтымақтастық ұйымына мүше елдердің саммитін де сөз етті. Астанаға келген мейман көрме кезінде ұйымға арнайы павильон ұсынылып, онда экологиялық бағдарламаны таныстыруға мүмкіндік жасалғаны үшін Ахметжан Есімовке алғысын білдірді. Еске сала кетейік, EXPO көрмесі аясында 27 тамызда Шанхай ынтымақтастық ұйымының күні өтеді.
Рашид Алимов, ШЫҰ Бас хатшысы:
– EXPO көрмесі тек ғылым мен техника жетістіктерімен шектелмейді. Көрменің көздегені адамзаттың болашақта қандай экологиялық ортада өмір сүретіндігін көрсету. Сондықтан Шанхай ынтымақтастық ұйымына мүше елдер үшін EXPO көрмесінде өз павильоны болғаны аса маңызды. Әлбетте осы мақсатта ҚР президенті Нұрсұлтан Назарбаевтың атқарып жатқан еңбегі ерен. Әсіресе Астанада өтетін EXPO-2017 көрмесі арқылы Шанхай ынтымақтастық ұйымының беделі асқақтай түсетіні сөзсіз.
Бурабай ЮНЕСКО геопарктерінің тізіміне енуі мүмкін
Дереккөз: www.24.kz
«Щучье-Бурабай курортты аймағы ЮНЕСКО-ның ғаламдық геопарктер тізіміне енуі мүмкін.
Бұл әлем халқын Бурабайдың көркем табиғатына назар аудартып қана қоймай, киелі өлке жайлы шетелдіктердің көп мағлұмат алуына жағдай жасайды»,- дейді мамандар.
Мәселен, қазір ғаламтордан Бурабай жайлы ақпарат табу қиынға соғады екен. Ал курортты аймақ ЮНЕСКО-ның геопарктер тізіміне енсе, халықаралық ұйым аңыз өлке жайлы мәліметтерді жинақтап, оның қолжетімді болуын қамтамасыз етпек. Одан бөлек бұл мұндағы туризмді де дамытуға сеп болады.
Бурабайға келген ЮНЕСКО-ның өкілдері, ғаламдық геопарктер тізіміне қалай енуге болатынын түсіндірді. Ол үшін Қазақстан тарапы биыл қазан айында ұйымның Франциядағы бас штаб-пәтеріне өтініш хат жолдауы қажет. Ол өтініштің өзі 3 айдай қаралады. Қазір аталған ұйымның қарамағында 119 геопарк бар. Олар әлемнің түкпір-түкпірінде орналасқан.
Патрик Маккивер, ЮНЕСКО-ның халықаралық геопарктер бағдарламасының директоры:
– Мен Бурабайға бүгін келе сіздердің өте қонақжай екендеріңізге көзім жетіп, соған тәнті болдым. Бұл әлбетте туризмді дамытудың бірден-бір маңызды тетігі. Мұндай қошемет пен құрметті көрген турист келесі жолы осы өлкеге тағы келері анық. Менің мұнда келгендегі мақсат-міндетім – бүгінгі талқыланған мәселелерді басшылыққа жеткізу. Әрі осы жақтағы мамандарға кеңес беру.
Шынарбек Батырханов, облыстық туризм басқармасының жетекшісі:
– ТМД кеңістігінде, Қазақстанда бірінші рет мынау Орталық Азия елдерін қарайтын болсақ, біздің Қазақстанға ЮНЕСКО көңіл бөліп отыр. Бұл беріліп отырған үлкен статус. Біздің табиғатымыз үлкен халықаралық деңгейде қорғау мәселесіне кіріп жатыр.
2017 жылдың 29-31 наурыз аралығында «Қоршаған ортаны қорғау және табиғатты пайдалану саласындағы мемлекеттік бақылау» тақырыбына өткізілген семинар туралы баспасөз хабарламасы
ҚР ЭМ «Қоршаған ортаны қорғаудың ақпараттық-талдау орталығы» ШЖҚ РМК 2017 жылдың 29-31 наурыз аралығында Астана қаласында «Қоршаған ортаны қорғау және табиғатты пайдалану саласындағы мемлекеттік бақылау» тақырыбына қоршаған ортаны қорғау және табиғатты пайдалану саласындағы мамандар үшін оқыту семинарын өткізді.
Семинарға қатысушылар келесі ұйымдар өкілдері:
– ҚР ЭМ «Қазақстан Республикасының Ұлттық ядролық орталығы» ШЖҚ РМК «Байкал» филиалы;
– ҚР ЭМ «Қазақстан Республикасының Ұлттық ядролық орталығы» ШЖҚ РМК «Радиациялық қауіпсіздік және экология институты» филиалы;
– «Сагиз Интер 1937» ЖШС;
– «Қазақ ұлттық аграрлық университеті» коммерциялық емес акционерлік қоғам;
– «С. Сейфуллин атындағы Қазақ агротехникалық университеті» АҚ.
Семинарда мына мәселелер қарастырылды:
- Инспекторлық тексеруді ұйымдастыру және жүргізу тәртібі;
- Мемлекеттік экологиялық бақылау, шаруашылық және өзге қызметтерді жүзеге асырудағы экологиялық талаптар;
- Экологиялық реттеу салаларындағы экологиялық заңнамаларды іске асырудағы соңғы өзгертулер мен келешегі;
- Қазақстан Республикасының экологиялық заңнамасын бұзғаны үшін жауапкершілік және т.б.
Дәріс оқығандар:
Тастамбекова Зинагул Сагидулловна – ҚР ЭМ ЭРБК бас сарапшысы;
Токтасынова Тоты Клышбековна – ҚР ЭМ ЭРБК бас сарапшысы;
Ингербаева Жанат Умбетовна – ҚР ЭМ ЭРБК бас сарапшысы;
Абилова Ляйа Толегеновна – ҚР ЭМ ЭРБК бас сарапшысы;
Садвокасова Алия Малаевна – ҚР ЭМ «ҚОҚ АТО» ШЖҚ РМК МЭАҚД басқарма басшысы маманы;
Асербаева Гаухар Ризабековна – ҚР ЭМ «ҚОҚ АТО» ШЖҚ РМК МЭАҚД басқарма басшысы маманы.
Семинар соңында білімді бағалауды өткізгеннен кейін куәліктер табыс етілді.
Алматыда «Қоршаған орта және денсаулық» атты аймақтық кездесу басталды
Дереккөз: www.24.kz
Орталық Азия елдері денсаулық сақтау және экология саласындағы түйіткілді мәселелерді бірлесе шешпек.
Осыған орай Алматыда «Қоршаған орта және денсаулық» атты аймақтық кездесу басталды. Жиынға дүниежүзілік денсаулық сақтау ұйымының өкілдері, Орталық Азия елдеріндегі экология саласының мамандары және отандық ғалымдар қатысып жатыр.
Сарапшылардың мәліметінше, Орталық Азиядағы экологияға табиғи ресурстардың сарқылуы, зиянды заттардың көбеюі және ауызсу сапасының төмендігі әсер етуде. Еліміздегі экологиялық жағдайды бақылау үшін арнайы атлас жасалған. Нәтижесінде, қазақ жерінің 70 пайызы жарамсыз екені анықталды. Ендігі мәселе – құнары азайып бара жатқан жерлерді қайта қалпына келтіру. «Экологиясы нашар аймақтардағы тұрғындардың денсаулығына көңіл аудару керек», – дейді сарапшылар.
Құралай Кәрібаева, Экология және орнықты даму институтының директоры:
– Жерді тозудың 70 пайызға жеткеніне экологиялық атлас жасады. Соның бүгінгі күні қай сатыда екеніне ауыл шаруашылығы үкіметтен қаржы бөліп, биылдан бастап осы Қазақстанның бүкіл жер ресурсын қайтадан картаға түсірейін деп жатыр.
Бүкіләлемдік денсаулық сақтау ұйымының өкілдері экономикасы дамыған Еуропа елдерінің өзінде ауызсудың нашарлығынан және қоршаған ортаның ластануынан жыл сайын 600 мың адам көз жұмады дейді. Сондықтан көптеген ел баламалы энергияны қолға алып жатыр.
Элизабет Паунович, Бүкіләлемдік денсаулық сақтау ұйымының өкілі:
– Бүкіләлемдік денсаулық сақтау ұйымының мәліметінше, бүгінгі күні 1,4 млн ауру қоршаған ортаның ластануынан туындап отыр. Мұнымен қоса ауызсу мәселесі де көптеген елде шешілмей отыр.
Ғалымдар бас қосқан жиында қоршаған ортаны қорғау арқылы адамдардың өмір сүру көрсеткішін арттыру жолдары талқыланбақ.
Авторлары: Аршын Кемелжан, Сержан Жұмабаев
EXPO халықаралық көрмесіне өтініш қабылдау аяқталды
Дереккөз: www.24.kz
«ЭКСПО-2017» халықаралық көрмесіне өтініш қабылдау аяқталды.
Бүгінге дейін 115 мемлекет пен 20 халықаралық ұйым қатысатынын ресми түрде растады. Бұл туралы «ЭКСПО» көрмесінің халықаралық қатысушылармен жұмыс департаменті директоры Илья Оразақов мәлімдеді. Оның айтуынша, көпшілігі қазірден павильонға заттарын қойып жатыр.
Айта кетейік, халықаралық көрменің басталуына 73 күн қалды.
Илья Оразақов, «ЭКСПО-2017» ҰК Халықаралық қатысушыларымен жұмыс департаментінің директоры:
– Қытай күннен қуат алуға қатысты қызықты жобаларын ұсынбақ. Оған қоса Жапония адамнан жылу алу жұмысын таныстыратын болады. Израиль өз кезегінде жерден қуат алу жобасын қатысушыларға көрсетеді. Осы секілді қызықты жобалар көп.
Жасыл экономика. Жастардың «жасыл» технологиялары
Дереккөз: www.24.kz
Бүгінгі жастардың инновацияға қызығушылығы мықты. Назарбаев зияткерлік мектебінің оқушылары бір-бірінен асып түсетін идеяларды жүзеге асыруға тырысып жатады. Қазіргі балаларға қарап елімізде «жасыл» экономиканың негізін құрайтын ұрпақтың өсіп келе жатқанын байқауға болады. Олар «жасыл» жобалардың өз құнын ұзақ мерзімге ақтайтынын да біледі.
ҚР ЭМ «Қоршаған ортаны қорғаудың ақпараттық-талдау орталығы» ШЖҚ РМК 2017 жылдың 15-17 наурыз аралығында Атырау қаласында «Экологиялық кодекс. Құқыққолдану» тақырыбына қоршаған ортаны қорғау және табиғатты пайдалану саласындағы мамандар үшін оқыту семинарын өткізді.
Семинарда табиғатты пайдаланушы кәсіпорындардың 17 маманы оқытылды.
Семинарға қатысушылар келесі ұйымдар өкілдері: «Консолидейтед Контрактинг Инжиниринг & Прокьюрмент С.А.Л. – Офшор» компаниясының филиалы; «ДорВестСтрой» ЖШС; «Светланд Ойл» ЖШС; «Атырау жылу электр орталығы» АҚ; «Маңғыстаумұнайгаз» АҚ; «ҚМГ Қарашығанақ» ЖШС; Атырауский филиал ТОО «СИНОПЭК Қазақстан Халықаралық Мұнай Сервис Компаниясы»; ЖШС Атырау филиалы; «Промэкология» ЖШС; «Теңізшевройл» ЖШС.
Дәріс оқығандар:
Токтасынова Тоты Клышбековна – ҚР ЭМ ЭРБК бас сарапшысы;
Ингербаева Жанат Умбетовна – ҚР ЭМ ЭРБК бас сарапшысы;
Булатова Зарина Исмагуловна – ҚР ЭМ «ҚОҚ АТО» ШЖҚ РМК МЭАҚД БАҚБ басшысы.
Семинар соңында білімді бағалауды өткізгеннен кейін куәліктер табыс етілді.